На XXXI летніх Алімпійскіх гульнях Беларусь будуць прадстаўляць 123 спартсмены і 57 трэнераў, з іх 23 прадстаўніка Гарадзеншчыны. У ліку відаў спорту, з якімі звязаны вялікія надзеі нашай зборнай – мастацкая гімнастыка, цяжкая атлетыка, веславанне на байдарках і каноэ, шашэйныя велагонкі, скачкі на батуце і некаторыя дысцыплiны лёгкай атлетыкi.
Хакеісты “Нёмана” 25 ліпеня ў таварыскім матчы, які праходзіў у Гродне, упэўнена абыгралі ХК “Ліда” з лікам 4:1.
Рэспубліканскі турнір, прысвечаны Дню пажарна-ратавальнай службы, праходзіў 19-22 ліпеня ў Салігорску. Гарадзенцы вярнуліся са спаборніцтваў са срэбрам і бронзай за камандную эстаферу ў чацвёрках і золатам за пераадоленне штурмавой лесвіцы ў асабістым заліку.
Жанчына самавольна сышла з гродзенскага раддома каля 24 ліпеня 4.00. Міліцыя прасіла дапамогі ў яе вышуку, але днём 25 ліпеня яе ўдалося знайсці.
Невядомы жартаўнік 24 ліпеня вырашыў пацешыць гараджан і ад душы дадаў мыйнага сродку ў фантан у парку Жылібера, дзякуючы чаму той стаў падобны да вялікай пеннай ванны. На наступную раніцу, у панядзелак, супрацоўнікам “Гарсвятла” спатрэбілася больш за дзве гадзіны, каб прачысціць фантан ад пены.
На аўтафестывалі SunDay-2016, які праходзіў 23 ліпеня ў Караліно каля Гродна, адбылася бойка. Прадстаўніку клуба “Honda Гродна” зламалі нагу, а яго сябру, які заступіўся, выбілі зубы.
Рыма – яшчэ не спявачка, кантрактаў у яе няма. У музычнай сферы ў яе, па сутнасці, яшчэ нічога не адбылося. Але спяваць ды жыць у Штатах яна хацела з дзяцінства. Так і атрымалася: дзяўчына пісала песні яшчэ ў Гродне, але запісвацца ў студыі стала ўжо ў Лос-Анджэлесе. Цяпер яна хоча выпусціць альбом і трапіць на шоў “Голас”.
Трэці канцэрт з цыклу “Нядзеля ла палаца”, які прайшоў 24 ліпеня, быў прысвечаны гарадскому рамансу і шансону. Выступілі гарадзенскія рускамоўныя барды з аўтарскімі песнямі: Анатоль Кулакоўскі, Андрэй Татур, дуэт Вольгі Галаўні з Сяргеем Іллюшэнкам. Адзіная за ўвесь вечар беларускамоўная песня “Малюю свой горад” прагучала з вуснаў Вольгі Калмаковай.
Да існуючага цягніка Hańcza PKP Intercity, які ездзіць з Беластока ў Кракаў, могуць дачапіць бесперасадачныя вагоны з Гродна. Першы такі састаў можа рушыць ужо 4 верасня. Такім чынам Міністэрства інфраструктуры і будаўніцтва Польшчы хоча вярнуць чыгуначнае спалучэнне паміж Беластокам і Гродна. Зараз вядуцца перамовы з Беларускай Чыгункай, каб дасягнуць канкурэнтнай цаны білетаў, піша Rynek kolejowy.
Свята з нагоды закрыцця 35 тэатральнага сезона адбылося ў Гродзенскім тэатры лялек 24 ліпеня. Юныя тэатралы разам з бацькамі і артыстамі ўдзельнічалі ў конкурсах, бавіліся з лялькамі, гулялі ў настолкі ад крамы “Кубік” і частаваліся слодычамі ад кавярні “Шэкспір”. Каб за час канікулаў гледачы не забыліся пра тэатр, за актыўны ўдзел у конкурсах яны атрымлівалі запрашальныя білеты на адкрыццё новага сезона.
